नेकपा एमालेले असोज ३ गतेको संविधान दिवस मनाउने तयारी गरिरहेको छ। जेन–जी आन्दोलनपछि सत्ताबाट बाहिरिएको एमालेले संविधान दिवसको अवसर पारेर शक्ति प्रदर्शनको तयारी थालेको हो।

संविधान दिवसकै अवसरमा पार्टी अध्यक्ष केपी शर्मा ओलीलाई फेरि मैदानमा उतार्ने तयारी थालिएको बुझिएको छ। जेन–जी आन्दोलनपछि नेपाली सेनाको सुरक्षामा रहेका ओली अहिलेसम्म सार्वजनिक भइसकेका छैनन्।

तर, संविधान दिवसको छेको पारेर अध्यक्ष ओलीलाई मैदानमा उतार्ने स्थायी कमिटी सदस्य महेश बस्नेतले बताए। मंगलबार ललितपुरको च्यासलमा जलेको केन्द्रीय कार्यालयमा आयोजित समारोहमा बोल्दै बस्नेतले संविधान दिवसको कार्यक्रममा ओलीलाई उतार्ने उद्घोष गरेका हुन्।

‘असोज ३ गते संविधान दिवस छ। नेकपा एमालेले यही पार्टी कार्यालय प्रांगढमा सानदार ढंगले संविधान दिवस मनाउँछ,’ उनले भने, ‘पार्टी अध्यक्ष(ओली)लगायत सबै नेताहरू संविधान दिवसमा सहभागी हुनुहुने छ।’

यस्तै एमालेले अन्य पार्टीसँग पनि संविधान दिवसको कार्यक्रममा सहभागी गराउने विषयमा छलफल गर्ने उनले बताए। अन्य पार्टी आए पार्टी कार्यालयमा हुने भनिएको कार्यक्रम परिवर्तन हुन पनि सक्ने बस्नेतले बताए।

‘कांग्रेस, माओवादी र अरू साथीहरू पनि संविधान दिवसमा आउनुभयो भने पार्टी कार्यालयको भेन्यु(स्थान) चेन्ज हुनसक्छ, हामी तपाईँहरूलाई सूचित गर्नेछौं,’ बस्नेतले भने।